دمشق – سوكة نيوز
دائرة الإنذار المبكر والتأهب بوزارة الطوارئ وإدارة الكوارث السورية حذّرت اليوم التلاتاء من تأثيرات المنخفض الجوي التالت اللي رح تشهدها البلد، بداية من ظهر اليوم ولغاية مساء الجمعة الجاية. الدائرة أكدت إنو ذروة فعاليتو رح تكون من ظهر الأربعاء لفجر الجمعة.
الدائرة أوضحت ببيان إلها إنو هالمنخفض رح يترافق مع أمطار رعدية متوسطة وغزيرة بكل المناطق السورية، وخصوصي الشرقية والجزيرة. وكمان رح تتحول التساقطات لثلج فوق جبال القلمون وحرمون. بالاضافة لهبات ريااح قوية ممكن توصل للعاصفة يوم الجمعة، والبحر رح يكون مضطرب وموجو عالي.
وبناءً على هالشي، حذرت دائرة الإنذار المبكر والتأهب من وجود أمطار غزيرة بالحسكة ودير الزور وشرق وجنوب الرقة. كمان رح تكون الأمطار متوسطة وغزيرة بإدلب وحلب وحماة وريف دمشق الغربي والشمالي والقنيطرة وغرب درعا والسويداء وشمال وغرب الرقة. وأضافت إنو رح يكون في أمطار متوسطة الغزارة بتغزر أحياناً بجنوب وشرق دمشق وبقية مناطق درعا والسويداء.
وبالنسبة للرياح، الدائرة أشارت إنو هبات الرياح ممكن تتجاوز 80 كيلومتر بالساعة بجبال الساحل وغربي محافظات حمص وحماة ودير الزور ومرتفعات جبل العرب. ورح تكون بين 65 و80 كيلومتر بالساعة بمحافظات دمشق وريف دمشق ودرعا والقنيطرة وطرطوس واللاذقية وحماة وحمص وجنوب الرقة ودير الزور. أما بإدلب وحلب والحسكة وبقية مناطق الرقة، فرح تكون بين 50 و65 كيلومتر بالساعة.
الدائرة دعت لضرورة إنو ما حدا يركب البحر، سواء للتنقل أو للفسحة أو للصيد. وكمان شددت على أهمية إنو ناخد الاحتياطات اللازمة للبيوت القريبة من الأنهار، تحسباً لارتفاع منسوب المي، وضرورة الابتعاد عن مجاري الأودية والمناطق الواطية. وحذرت من إنو حدا يخاطر ويقطع أي مجرى مي لو شو ما كانت نسبة المي قليلة.
كما شددوا على أهمية إنو نتجنب نمشي بالطرقات اللي غمرتها المي والطرق الزراعية، وما نقرب على أي مجرى مي مشان ما نتعرض لخطر الانزلاق أو الوقوع. ووجهوا نصيحة بحماية الأطفال وكبار السن والنسوان وذوي الإعاقة من إنو يقربوا على مجاري السيول، وكمان عدم المخاطرة بالتصوير أو نقرب لنشوف السيول.
وأشارت الدائرة لضرورة إنو نبعد عن الجسور اللي مبنية فوق مجاري المي إذا صار فيها جريان مي قوي وكبير، وما نجازف بإنو نقطعها بالسيارات. ودعت كمان لإنو ما نوقف السيارات بمناطق واطية أو جنب مجاري المي، وما نستعمل الموبايلات تحت العواصف الرعدية.
وكمان دعت لإنو ما نوقف جنب الشجر وأبراج الكهربا وقت العواصف الرعدية، ونخفف السرعة بالطرقات اللي فيها أمطار غزيرة. ولفتت الدائرة لأهمية إنو ما نوقف بالأماكن العالية أو جنب الشجر الكبار وأبراج الكهربا وخصوصي بالمناطق اللي فيها هبات رياح بتتجاوز 80 كيلومتر بالساعة. وأكدت على ضرورة تثبيت الخيام منيح، والابتعاد عن الأبنية والجدران المكسرة أو المتصدعة اللي ممكن تنهار بسبب هبات الرياح القوية، وكمان تثبيت الشغلات اللي ممكن توقع.
اقرأ أيضاً: https://www.sookeh.com/syrian-provinces/homs/مديرية-الموارد-المائية-بحمص-تنظيف-الم/6933/
