دمشق – سوكة نيوز
كتير دول عربية نددت مبارح السبت بتصريحات حكاها سفير أميركا بإسرائيل، مايك هاكابي، يلي شاف إنو التقاليد التوراتية بتعطي إسرائيل الحق بأراضي بتتمد على جزء كبير من الشرق الأوسط.
الإعلامي الأميركي المحافظ تاكر كارلسون عمل مقابلة مع هاكابي، يلي هو قس معمداني سابق وواحد من أهم الداعمين لإسرائيل، وعينه الرئيس دونالد ترمب سفير بسنة 2025.
وبحلقة البودكاست يلي انعرضت أول مبارح الجمعة، كارلسون سأل السفير عن فهمه لآية بسفر التكوين بتقول إنو إسرائيل إلها حقوق بأراضي بين نهر النيل والفرات، يعني بتمتد من مصر للعراق وسوريا.
هاكابي جاوب وقاال: “أنا بعتقد إنو هاد شي صحيح. وهاد بيشمل الشرق الأوسط كلو”، وزاد عليها: “بيكون منيح لو أخدوه كلو”.
كتير دول عربية استنكرت هالتصريحات بقوة. السعودية اعتبرت حكي هاكابي “غير مسؤول” و”سابقة خطيرة”، بينما الأردن شاف إنو هاد “مس بسيادة دول المنطقة”.
مصر أكدت إنو “إسرائيل ما إلها سيادة على الأرض الفلسطينية المحتلة ولا على أي أراضي عربية تانية”.
الكويت كمان نددت بهالتصريحات يلي “بتخالف بشكل واضح مبادئ القانون الدولي”، وسلطنة عمان أكدت إنها “بتقوض فرص السلام وبتهدد أمن واستقرار المنطقة”.
السلطة الفلسطينية شافت إنو تصريحات هاكابي “بتعارض موقف الرئيس الأميركي دونالد ترمب الواضح برفض ضم الضفة الغربية المحتلة”.
السفير الأميركي نزل منشورين على منصة “إكس” يوم السبت ليوضح موقفه بخصوص مواضيع تانية انحكت بالمقابلة، متل تعريف الصهيونية، بس ما رجع حكى عن تصريحاته يلي بتتعلق بسيطرة إسرائيل على أراضي بالشرق الأوسط.
هالتصريحات من هاكابي اجت بوقت إسرائيل عم تكثف إجراءاتها لتزيد سيطرتها على الضفة الغربية، يلي محتلتها من سنة 1967.
إسرائيل أعلنت من عقود ضم القدس الشرقية وجزء من مرتفعات الجولان السورية.
