دمشق – سوكة نيوز
الرئيس السوري أحمد الشرع أكد بكلمة ألقاها بقصر الشعب بعد صلاة عيد الفطر إنه أولى أولويات الدولة هي تقوية المواطن وتحسين معيشته، ووضح إن الشغل مستمر ليل نهار كرمال يوصلوا لمستوى بيليق بالسوريين.
وشدد الشرع على إطلاق برنامج جديد مشان ينهي المخيمات، مع التركيز على رجوع الأهالي لقراهم وبلداتهم بعد سنين طويلة من التهجير.
وبخصوص إعادة الإعمار، وضح الرئيس الشرع إن الموازنة الجديدة خصصت مصاري كتيرة مشان إعادة تأهيل البنى التحتية، خصوصاً بأرياف إدلب وشمال حماة وشمال اللاذقية وأرياف حلب والغوطة الشرقية. كمان أشار لتخصيص دعم خاص للمناطق الشرقية، يللي بتضم دير الزور والحسكة والرقة، بهدف تحسين الخدمات الأساسية متل المشافي والمدارس والطرق.
وكشف الشرع إن الناتج المحلي تراجع لشي 20 مليار دولار بسنة 2024، بعد ما كان 60 مليار دولار بسنة 2010، والموازنة كمان نقصت لشي 2 مليار دولار بأوج الأزمة. بس أشار إنه موازنة سنة 2026 وصلت لـ 10.5 مليار دولار، وهالشي بيعني زيادة حوالي 3 أضعاف مقارنة بسنة 2025.
وعن زيادة الأجور، أعلن الرئيس الشرع عن تحديد حد أدنى للأجور بيراعي معدلات الفقر، وأكد إن الهدف الأساسي هو إنه المواطن يقدر يعيش بكرامة ويكفي حاله. ووضح إن الزيادات وصلت لشي 550% بشكل عام، وفي حالات معينة سجلت زيادات أكبر وصلت لـ 1200%.
وأكد الشرع إن المناطق يللي رجعت لسيطرة الدولة ساهمت برجوع موارد مهمة، وهالشي رح يدعم الاقتصاد بمجالات الطاقة والغذاء والمي. وأشار كمان إن 40% من الموازنة رح تروح لقطاعات الخدمات متل الصحة والتعليم.
وبخصوص الشغل الحكومي، وضح الرئيس السوري إن الحكومة عم تشتغل على عقد أول جلسة لمجلس الشعب قريباً، بعد ما يخلصوا كل الترتيبات. وذكر إن المجلس رح يكون مسؤول عن وضع الخطط الاستراتيجية ومراقبة تنفيذها. وأضاف إن تأجيل الجلسة صار كرمال يستنوا لتخلص الانتخابات بالمناطق يللي “تحررت جديد”.
وبالشأن الإقليمي، أكد الرئيس إن السياسة الحالية ساعدت سوريا تضل على الحياد نسبياً بالنزاعات، مع الحفاظ على علاقات متوازنة على مستوى المنطقة والعالم، “رغم التحديات الكبيرة يللي عم تزيد بالمنطقة”.
اقرأ أيضاً: https://www.sookeh.com/variety/culture/أطفال-دمشق-وجناح-الطفل-بمعرض-الكتاب-إع/3957/
